लहान मुलांची भूक वाढवण्यासाठी काय करावे?

लहान मुलांची भूक वाढवणारे प्रभावी उपाय!

तसं बघायला गेलं तर साधारणपणे सर्वच मुलं जेवणाचा कंटाळा करताना दिसतात त्यामुळे भुक न लागणं हा कोणताही आजार नाहीये. पण हो, भूक न लागणं हा होणा-या आजाराचा संकेत जरुर असू शकतो. त्याव्यतीरिक्त मनासारखं जेवण किंवा चटपटीत गोष्टी न मिळाल्याने मुलं जेवताना किटकिट करत राहतात. म्हणूच मुलांना वेळेत जेवायला लावणं कठीण काम असतं. काही मुलं तर जेवण्यास स्पष्ट नकार देतात, त्यामुळे त्यांना तासनतास समजावत बसावं लागतं. तर काही मुलांना जेवण नाही तर मॅगी, न्युड्ल्स किंवा फास्ट फुड जास्त आवडतं आणि व्यव्स्थित न जेवल्याने त्यांना कमजोरी येते. त्यामुळेच जर तुमचीही मुलं जेवण्यास टाळाटाळ करत असतील तर त्यामागे काहीतरी गंभीर समस्या जन्म घेत असू शकते. न जेवल्याने शरीराला पोषक घटक किंवा जीवनसत्व न मिळाल्याने मुलं आजारी पडतात. तर जाणून घ्या मुलांना भूक न लागण्याची कारणे आणि त्यावरील प्रभावी उपाय!

भूक न लागण्यामागील कारणे

खरंतर ब-याच जणांना भूक न लागण्याचा त्रास जाणवतो. पण लहान मुलांमध्ये भूक न लागण्याचे प्रमाण आणि त्यामुळे पालकांच्या भूकेसंदर्भात वाढत्या तक्रारी बघून आपल्याला समजतं की ही समस्या किती गंभीर आहे. कितीतरी पालक आपल्या मुलाला भूक लागत नाही म्हणून डॉक्टरकडे नेतात आणि विविध उपचार करतात. तसेच कधी कधी भूक लागण्याची टॉनिक सुद्धा देतात. पण या भूक लागण्यामागील कारणं तुम्हाला माहित आहेत का?

१) शरीरात लोहाची कमतरता असल्यामुळे

२) हिपॅटायटीस-ए च्या लसीकरणामुळे

३) मेनिंजाइटीस झाल्यामुळे

४) खूप जास्त प्रमाणात फास्ट फुडचे सेवन केल्यामुळे

५) गोड पदार्थ जास्त खाल्ल्यामुळे

या कारणांव्यतीरिक्त आवडणारं जेवण न मिळाल्याने मुलं जेवण्यास नाटक करताना दिसतात.

भूक वाढवण्यासाठी

भूक लागत नाही म्हणून तुम्ही मुलांकडे दुर्लक्ष करण्यापेक्षा वेळीच त्यांच्यावर उपचार केले तर कदाचित या समस्येतून त्यांची लवकर सुटका होऊ शकते. जर तुमची मुलं जेवण्यास टाळाटाळ करत असतील तर तुम्ही जेवणामध्ये वेगवेगळ्या प्रकारच्या गोष्टी मिसळून त्यांची भूक वाढवू शकता. जेवनातून भरपूर प्रमाणात पोषक तत्वे मिळत असतील तर तुमची मुलंही अगदी सहज जेवायला तयार होतील. कधी कधी जेवणामध्ये त्यांच्या आवडत्या गोष्टींनाही प्राधान्य द्या, म्हणजे त्यांची जेवणावरुन उडून गेलेली पुन्हा जागृक होईल.

विटामिन ‘सी’

जर लहान मुलांना भूक लागत नसेल तर त्यांना ‘सी’ विटामिनयुक्त आहार द्यावा. जसं की टॉमेटो, कीवी, लिंबू, संत्री, स्ट्रॉबेरी आणि लोहयुक्त पदार्थही द्या. विटामिन ‘सी’ शरीरातील लोह वाढण्याचं काम करत असल्याने चांगली भूक लागण्यास मदत होते. तर असा पद्धतीने विटामिन ‘सी’ चा वापर करुन तुम्ही मुलांची भूक वाढवू शकता. जर जेवणामार्फत तुम्हाला हे मुलांना देता येत नसेल तर फळांद्वारे तुम्ही ते मुलांना देऊ शकता.

सोआ डील

कोणत्याही रासायनिक कीटकनाशकांविना आणि खतांशिवाय तयार केली जाणारी ही एक प्रकारची औषधी वनस्पती आहे. त्यामुळे ही वनस्पती मानव जातीसाठी एखाद्या खजिन्यापेक्षा कमी नाही. यामध्ये मेथी आणि पालकप्रमाणेच जीवनसत्व, फॉलिक अॅसिड आणि महत्वपूर्ण क्षार आढळून येतात. यामुळे अपचनाचा त्रास, मळमळ, भूकेची कमी दूर करण्यास मदत करते. हे सूपमध्ये टाकून तुम्ही मुलांना देऊ शकता किंवा याचा वापर मसाल्यांसारखाही जेवणात केला जाऊ शकतो.

पोषक तत्वे असणारा आहार

लहान मुलांच्या आहारात पालक, कडधान्ये, पास्ता, भात, वाटाणे, चणे, ब्रोकोली आणि हिरव्या पालेभाज्यांचा समावेश केला पाहिजे. या गोष्टींमुळे मुलांच्या शरीरातील पोषक तत्वे वाढीस लागतात व त्यांना भूक लागण्यास मदत होते.

तर या काही साध्या सोप्या गोष्टींवर लक्ष केंद्रित केल्याने मुलांची भूक वाढून ते कोणताही पदार्थ अगदी आवडीने खाऊ लागतील. तसेच यामुळे त्यांच्यातील अशक्तपणा दूर होऊन त्यांच्या वाढीसोबतच सशक्त राहण्यासही मदत होऊ शकते.